Ҫӗнӗ Шупашкарти Винокуров урамӗнче карас ҫыхӑнӑвӗн вышки ҫуннӑ. Инкек сӑлтавӗ — электрообрудовани юсавсӑрлӑхӗ.
Пӑтӑрмах утӑ уйӑхӗн 7-мӗшӗнче пулса иртнӗ. Вут-ҫулӑм телекоммуникаци шкапӗнче алхаснӑ. Вырӑна пырса ҫитнӗ пушарпа кӗрешенкесем ҫулӑма хӑвӑрт сӳнтернӗ, ҫавна май пысӑк тӑкак тӳсмен.
Ҫӗнӗ Шупашкар хулин пуҫлӑхӗ Максим Семёнов хӑйне отставкӑна янипе килӗшесшӗн мар. Вӑл вырӑнти Депутатсен пухӑвӗн йышӑнӑвне хирӗҫлесе суда тавӑҫпа тухнӑ.
«Правда ПФО» тӗнче тетелӗнчи хаҫат хыпарланӑ тӑрӑх, суд ун пек ӗҫсене хӑвӑрт, заявлени пырса ҫитнӗ хыҫҫӑн 10 кунта, пӑхса тухать. Юристсем шухӑшланӑ тӑрӑх, ответчика хӳтӗленме ҫӑмӑл пулас ҫук, мӗншӗн тесен муниципалитет органӗ ун пек йышӑнӑва хӑйӗн полномочийӗпе килӗшӳллӗн туман имӗш.
Чӑваш ЕН Элтеперӗн суйлавӗ ҫывхарса килет. Унта хутшӑнма хальлӗхе Олег Николаев ҫеҫ заявлени панине Чӑваш халӑх сайчӗ пӗлтернӗччӗ-ха.
Суйлава паянхи кун тӗлне илсен тата тепӗр тӑватӑ кандидат хутшӑнасси паллӑ. Вӗсене пурне те политика партийӗсем сӗннӗ.
Чи паллӑрах кандидат — Чӑваш Енӗн Патшалӑх Канашӗн депутачӗ Константин Степанов, вӑл ЛДПРӑн регионти уйрӑмне ертсе пырать.
«Пенисонерсен партийӗ» хӑйӗн ҫӗнӗ ертӳҫине Владимир Ильина сӗннӗ. Вӑл — «Чувашлифт» предприятин учредителӗ тата гендиректорӗ.
Симӗссисен партийӗ регионти канашӑн пердседательне Владимир Савинова суйлава хутшӑнтарасшӑн. Вӑл ӑслӑлӑх экспертизисен бюровне ертсе пырать.
Унсӑр пуҫне суйлава «Ҫӗнӗ ҫынсем» партирен Максим Морозов хутшӑнма пултарӗ. Вӑл тӗрлӗ компани учредителӗ, ҫав шутра Ҫӗнӗ Шупашкарти аш-какай комбиначӗн, Сӗнтӗрвӑрринчи аш-какай комбиначӗн; «Агротранс», «Центр Авто», «Модуль» обществӑсен.
Суйлава хутшӑнас кӑмӑллисен документсене утӑ уйӑхӗн 25-мӗшӗнчи 18 сехетчен парса ӗлкермелле.
Ҫӗнӗ Шупашкарти «Никольский» микрорайнти шкула авӑн уйӑхӗн 1-мӗшӗ тӗлне уҫма хатӗрленеҫҫӗ. Тӗп ӗҫсене вӗҫленӗ ӗнтӗ. Халӗ оборудование илсе килсе вырнаҫтараҫҫӗ.
Анчах куншӑн яваплӑ подрядчик графикрен самаях юлса пырать. Мӗншӗнне уҫӑмлатаҫҫӗ.
Шкул ҫӗнӗ вӗренӳ ҫулӗ тӗлне уҫӑлтӑр тесе объектри специалистсен шутне ӳстерме палартнӑ. Ҫав вӑхӑтрах документацие хатӗрлеҫҫӗ. Шкул строительстви мӗнле пынине тӳре-шара тӗрӗслесе тӑрать.
Ҫӗнӗ Шупашкарти йывӑр тиев причалӗнче ӗҫлекен Александр Торхеев «Профессире чи лайӑххи» Пӗтӗм Раҫҫейри конкурсӑн республикӑри тапхӑрӗнче ҫӗнтернӗ, халӗ вӑл Раҫҫей тапхӑрне хутшӑнма хатӗрленет.
Александр «Экскаватор машинисчӗ» номинацире тупӑшӗ.
Ҫӗнтерӳҫе 1 млн тенкӗ параҫҫӗ. Ӑна ҫӗнсе илме ентеше ӑнӑҫу сунатпӑр!
Ҫӗнӗ Шупашкарта ретротехника фестивалӗ иртнӗ. Унта ҫынсем 20 регионтан килсе ҫитнӗ.
Фестиваль «Кивӗ клаксон» ятлӑ. Унта XX ӗмӗрти машинӑсемпе мотоциклсене, мопедсемпе велосипедсене курма май пулнӑ. Сӑмах май, мероприятие кӑҫалхипе иккӗмӗш хут йӗркеленӗ. Кӑҫал «Авто Акатуй» та иртнӗ. СССРти костюмсен конкурсне те йӗркеленӗ, ҫӗнтерӳҫӗсене чысланӑ.
Фестиваль концертпа вӗҫленнӗ.
Ҫӗртмен 27-мӗшӗнче Пӗтӗм Раҫҫейри «Работа России. Время возможностей» ярмӑрккӑ иртӗ.
Тӗп лапам ЧР Наци библиотекинче пулӗ. Кунсӑр пуҫне ярмӑрккӑ Ҫӗнӗ Шупашкарти, Канашри, Ҫӗмӗрлери, Етӗрнери тата Кӳкеҫри «Раҫҫейри ӗҫ» кадр центрӗсенче ӗҫлӗ. Унта пыракансем ӗҫпе тивӗҫтерекенсемпе, пушӑ вакансисем пирки ыйтса пӗлме пултараҫҫӗ. Ҫавӑнтах ӑсталӑх класӗсемпе тренингсем иртӗҫ.
Ярмӑрккӑ 10 сехетрен пуҫласа 19 сехетчен ӗҫлӗ. Унта опытлӑ специалистсем кӑна мар, аслӑ классенче вӗренекенсем, студентсем, тивӗҫлӗ канурисем, сусӑрсем те хутшӑнма пултараҫҫӗ. Тӗплӗнрех «хӗрӳ линие» 8-800-350-80-58 (тӳлевсӗр) номерпе шӑнкӑравласа ыйтса пӗлме пулать.
Аслашшӗпе (е кукашшӗпе) манукӗ пулла кайсан пысӑк ҫуйӑнпа таврӑннӑ. Вӑл 25 килограмм таять, 1,5 метра яхӑн тӑршшӗ. Ку кӑна ма, пулӑ вӑлчаллӑ пулнӑ тата.
Вӗсем ӑна Ҫӗнӗ Шупашкартан инҫех мар Атӑлта тытнӑ. Пулла киле илсе килсен ваннӑна хунӑ. Пӗр ванна тӑршшӗ вӑл!
Республика кунӗнче Ҫӗнӗ Шупашкарти сӗтел-пукан фабрикинче пушар тухнӑ. Вут-ҫулӑма ҫӑлавҫӑсем ҫур сехетре сӳнтернӗ.
Инкек вӑхӑтӗнче шар курман.
Пушар Промышленность урамӗнчи производство ҫуртӗнче алхаснӑ. Вӑл ирхи 7 сехетсенче тухнӑ. Пушар ҫурт ҫивиттине тата вентиляци тытӑмне сиенлетнӗ.
Пушара сӳнтерме 3 единица техника тата 10 специалист хутшӑннӑ.
11-мӗш класран вӗренсе тухакансемшӗн – хӗрӳ тапхӑр. Экзаменсем пыраҫҫӗ. Хӑш-пӗр экзаменпа кӑтартусем паллӑ ӗнтӗ.
12 ҫамрӑк химипе пулнӑ ППЭре 100 балл пухнӑ. Вӗсен йышӗнче ҫаксем: София Ярабаева (Хӗрлӗ Чутай шкулӗ), Мария Федорова (Ҫӗнӗ Шупашкарти 18-мӗш лицей), Игорь Кавказков (Ҫӗнӗ Шупашкарти 18-мӗш лицей), Екатерина Горячева (Ҫӗмӗрлери 8-мӗш гимнази), Полина Нимакова (Шупашкарти 5-мӗш гимнази), Анастасия Никитина (Шупашкарти 3-мӗш лицей), Ольга Степанова (Шупашкарти 3-мӗш лицей), Анна Федотова (Шупашкарти 1-мӗш гимнази), Антон Пигузов (Шупашкарти 62-мӗш шкул), Виктория Адюкова (Шупашкарти 2-мӗш лицей), Злата Александрова (Шупашкарти 2-мӗш лицей), Ярослав Кутилин (Шупашкарти 2-мӗш лицей).
+28.3 °C